笨小孩之輕鬆記事

上英文果度，剛好響香港公園旁邊，
於是乎，有一曰，
放左學，就見到水亭果度有兩個傻人．．．．

呢個就係小笨響英文班認識的新朋友啦，
佢兩個好 friend 0架，
不過可惜剛剛熟左又要 say good bye 啦．．．

自從去完韓國，得到小飯的「啟發」，
小笨一洗手就哄住個「升盆」玩水、玩泡泡．．．

有一次仲攪到個浴室咁添．．．．

焗住笨媽無得懶啦，要洗浴室．．．．

為左唔好辜負張全年票，
八月份笨媽帶小笨去左兩次迪士尼玩。

小笨好乖喎，
事先解釋左佢知「驚掉左笨次妹出黎」，
結果佢對住０的機動遊戲有得睇、無得玩，
佢都完全無「狠」又無扭計喎～
最乖係，兩次佢都好想買 souvenir shop的毛毛公仔，
但係笨媽話唔買，佢都無扭計呀，
淨係拿拿聲攬多隻野幾下就放低，
又同隻野話「我第日再黎探你呀，知唔知？」
今日，可能「費事引自己」掛，走果陣佢仲竟然話直接去搭車，
唔入souvenir shop添！

其實笨媽又唔係吝嗇果少少錢，
畢竟入得果０的地方，飲枝水都廿蚊啦，
一百幾十買隻毛毛公仔，又唔係話貴到買唔起，
不過小笨實在太多毛毛公仔啦，
佢自己都知，多到兩大個膠箱都放唔曬，
咁，不如用０的錢買０的有用野仲好啦～

（其實呢兩次，笨媽都有買野俾小笨，
第一次係買史迪仔游水毛巾，今次係買跳跳虎帽，
好鬼得意０架，又有用，遲下放相過你地睇丫～
不過小笨對毛毛公仔係情有獨鐘．．．）

花左一個半月響British Council，
小笨英文終於有少少收穫啦！

今次唔止淨係識左上次講果兩個英文字咁大把啦，
而係親眼見佢竟然主動用英文同外籍老師講野！
（無錯，以前都好主動，不過係同外籍老師講廣東話，
個老師話「She keeps speaking to me in Cantonese…」）

果日放學的勞作係dragon wings，小笨一見到笨媽就著俾笨媽睇，
之後，竟然仲好開心咁走埋去大大聲同老師講：
「Miss Sonia, I can fly, do you see??」

雖然語法好似有０的怪，但係老師明佢講咩喎，
佢又好開心咁，講得好有信心添！

仲有一次，佢茶點的蝦條一出場就俾小朋友搶曬，
佢竟然識得同老師講「No more」，
老師就俾左塊餅乾佢食！
我問佢，你點識得講「No more」０既？
佢好理所當然咁答我：「係呀，因為茶點之前做手工，
小朋友枝膠水無曬，咁佢同老師講No more，
老師就換另一枝俾佢，之後我果枝膠水又無曬，我又話No more，咁囉～」

哈哈，真係好啦，笨媽暑假呢一萬蚊，都算係有少少回報，
小笨果十幾個鐘頭的眼淚，亦都總算無白流啦！

返親英文都喊曬０既小笨，
呢兩堂竟然玩「唔放學」．．．！！

明明見到笨媽，都只係瞄一瞄就算，
到老師叫佢名放學，
條友仔竟然仲要三催四請先至施施然收圖書行出黎，
連老師都話：「It is not the same child...!」
「No... She wants to stay with you more....」

笨媽不期然諗返起兩歲返 Nursery時，
喊足三個月的小笨，
放學竟然唔願走，要睇埋 Hello Kitty先．．．

哈，小朋友，適應力好強０既～～

（今日條友跳完舞，好開心咁走，
老師都話：「佢叻返曬啦，第一堂喊到嘔，真係俾佢嚇親！」
個職員仲話，佢係果間分校開業以來，第一個喊得咁勁、嘔得咁多０既小朋友．．．．）

今日小笨暑期跳舞班有 open house，
即係臨落堂前十五分鐘俾家長入去睇小朋友跳舞，
為左呢十五分鐘，
笨爸竟然請左半日假！

跳得真係好得意、好可愛，
不過唔係正式登台表演喎，
請半日假，好似好唔抵咁．．．

父愛，真係偉大～～
（事後笨爸仲同小笨講，話好好睇，
仲話好彩有請假睇到表演，唔知係氹細路定係真心話呢？？）

花左幾千蚊, 小笨的英文終於開始「見功」,
果日佢話返上堂個故事俾我聽,
仲識得學隻小貓頭鷹講:「I want my mammie!」
好開心啊, 第一次聽佢講一句完整的英文句子!!!!
而且証明佢上堂真係開始有少少明啦!!!

之後放學, 行響路上,
佢見到地上有0的油,
竟然問:「媽咪, 點解果度有0的 paint0既?」
哈哈, 勁啊!!!

今日, 佢又話:「媽媽, 我真係好想玩 magic 的、查查查果0的呀!」
「係咪水彩呀?」(因為之前佢已經話左想玩水彩好多次, 所以咁估.)
「係呀!」
一定係老師教佢地, 水彩會好似magic 咁變色啦!

無錯, 佢一共學識左三組/個英文啦.....!!!

今日去完街返屋企，循例叫小笨去洗手，
條友仔又「順便」玩吹泡泡，
笨媽入去「掃盪」時，當然係鬧鬼佢啦：
「死囉，你又玩曬我成枝梘液呀！」
勢估唔到，小笨唔出聲，以一副「沒好氣」的表情，隊枝梘液埋黎，
笨媽一睇，咦，點解枝梘液由三分一枝變左滿曬０既，唔通．．．＠＠！
笨媽：「咦．．．你幫媽媽裝滿左枝梘液呀？」
小笨一副「邀功樣」咁回答：「係呀，我乖唔乖呀？」
笨媽：「乖．．．乜咁乖呀今次．．．」

（註：小笨當然係用清水裝滿左枝梘液啦，即係話，枝梘液又報銷左．．．）

今日去Lucy家玩
館長姐姐幫小笨影左０的相，
烚下烚下又有、傻笑又有：