笨小孩之輕鬆記事

錦田鄉村俱樂部實在太好玩啦！
暑假帶小飯去至得！

一曰，小笨「唔小心」訓左晏覺，
仲訓左三大個鐘，由黃昏六點訓到夜晚九點，
於是，唔駛諗都知，到左十一、二點，
小笨都仲完全無睡意、精神過鬼啦。
笨媽深知捉佢訓覺等於徙大家時間，
於是特別批准小笨自己睇圖書和玩毛公仔，
安靜咁等埋笨媽泵完奶、洗完白白、做完家務一齊訓覺。

笨媽洗白白時，仲搬埋椅子，
安排無膽鬼李小笨入埋沖涼房，坐定定自己睇圖書。
小笨對於呢個咁新穎的安排，自然係十分之「新屎坑」，
興奮到飛起啦，懶好興緻咁、似模似樣睇圖書等笨媽洗白啦噃。

洗完白，笨媽仲要收衫、晾衫，小笨響一旁睇，無端端有感而發：

 「媽媽，我宜家終於知道，原來你夜晚做家務咁辛苦啦！」

「係呀係呀，媽媽好辛苦０架！」

 嘻嘻，雖然唔知小笨係賣口乖定係咩，
但小笨久不久就有０的咁０既窩心野，
哄得笨媽幾咁歡喜０架～

小笨是一個很有義氣的小寶貝。 

生完笨次妹之後，笨媽連續食左四個月中藥以調理身體，
小笨一直都知道媽媽要食苦苦藥藥，
亦有陪笨媽去「摸手手」睇醫生。
對於笨媽的苦苦藥，小笨一直顯得很好奇。
一日，小笨見笨媽飲藥，好想試下噃，
咁，笨媽就本住「嚇下佢」同埋「襯後生咩都試下」的心態，
俾小笨試下啦。小笨一試之下，
當然即刻扁曬咀苦曬口臉啦，但估唔到佢話：

「媽媽，我終於知道原來你咁慘慘，要飲咁苦０既藥。」

 笨媽聽到，不禁熱睙盈眶，隨即打蛇隨棍「詐女嬌」：

 「係呀，嗚，媽媽真係好慘慘０架！」

 但係更加勢估唔到，小笨諗左兩秒，竟然話：

 「好啦好啦，我幫你飲一半啦！」

 講０既時候極有「兩脅插刀」之勢！

 笨媽大為驚訝又感動：「０下？好苦０架喎？！！！」

 小笨：「唔怕啦，黎啦，黎啦，俾一半我啦！」

 嘩，真係義氣女啊！！！笨媽感動到呢～～！！！

小笨今日學校又「勾亭」，
係今學年第四次啦，
之前去過陽光笑容小樂園」、愛護動物協會同交通安全城，
今日就去海洋公園。

笨媽都好想去啊．．．

宜家０的細路仔真係幸福．．．．
四歲人仔０乍０番．．．．
節目多到呢．．．

由於記得換季前買左新校服，
所以當入夏時又有買校服通告，
笨媽仲胸有成竹咁無幫小笨買新的夏季校服。
勢估唔到，足足搵左成個四月份，笨
爸都搵唔返０的夏季校服出黎，
唉，放完復活節假，聽日返學就要換季啦，
惟有早少少返學校借衫啦，好樣衰添。。。

不過，又有得買新衫啦，ＹＥＡＨ！

由於老師話小笨外語水皮，
加上笨婆婆又成日話笨媽「識又唔教個女」
笨媽於是迫於無奈，
開始做自己最唔想的事：
迫小笨開口講外語。 

尋日晚飯同公主母女食，
好刻意咁教左小笨 I want to eat sausage, please.
咁，尋訓，小笨想笨媽講從前，
笨媽又乘機好刻意咁考小笨：
「如果想食腸仔點講呀？」
點知條友仔諗左一諗，
竟然答：
「Thank you for traveling with MTR.」
笨媽即時俾佢激死又笑死！

雖然明知佢專登玩野，
但真係幾攪笑，
而且証明地鐵廣播式的「教導」真係好有效！
笨媽要以地鐵做榜樣！！

尋日朝早小笨訓醒覺，
好開心咁話發夢自己養左三隻狗，
然後，佢突然諗到：「媽媽，你估我會唔會夢想成真呢？」
笨媽：「嗯，等你大個左，就可以養狗，到時咪夢想成真囉～」
小笨：「媽媽，可能０的狗仔依家呢左響出面（客廳）呢，不如你幫我出去睇下丫．．．」
笨媽：「嗯，我就估應該唔會啦．．．」
小笨（很堅持）：「唔該你丫．．唔該你丫．．幫我出去睇下丫．．．」
笨媽：「咁，一係我地一齊出去睇下啦，好唔好？」

於是，笨母女出左廳，
小笨周沙發底咁裝，
好希望自己可以夢想成真，
好希望夢中果三隻狗仔其實呢左響沙發底，
當然，結果係搵極都唔見啦．．．

小笨好失望好失望，
入返房，
扁住咀仔，一邊忍住眼淚，一邊話：「我真係．．．好想．．．可以．．．夢想成真．．」
講到後尾眼淚已經忍唔住幾乎滴出黎啦．．．

近來小笨多數係扭計或者受傷咁大喊，
好少見佢傷心咁喊，
仲要係強忍住淚水咁，
睇到笨媽都覺得佢好可憐咁，
幾傷心啊人家！

不過，現實係殘酷的，
小笨亦都要學習到，人生係有遺憾的，
加上，養寵物真係唔可以講玩，
所以，笨媽今次唔可以做「yes mom」啦～

一日，小笨邀請當時仍左「坐月」的笨媽食紫菜，
由於太寒涼，所以笨媽謝絕了小笨的分享。

類似的「謝絕」事件，在坐月期間都發生過幾次，
於是，今次，小笨就突然有感而發，
自言自語咁話：
「呀，你又幾乖０架喎，又幾聽醫生話０架喎．．．」

笨媽聽到，覺得好好笑，就得戚咁應佢話：
「梗係，媽媽係幾乖０架！」
點知小笨話：「你又係幾乖０既，不過唔係咁醒０者。」
笨媽覺得超好笑喎，就問：「０下，我唔係咁醒咩？咁要點至算係醒呀？
小笨：「好似我咁囉！」
笨媽：「．．．」

（咁．．．即係點呢？？）

一次，公公意圖 stop 小笨做一件曳事，都幾大聲喝小笨．．．

小笨：「媽媽！公公好曳呀！！！」
笨公公：「係你自己曳、做曳事！」
小笨：「你至係曳呀！！！公公好衰０架！！公公好曳０架！！！」
笨公公繼續嘮叨。
小笨：「唔準再鬧人呀！！！你再係咁我以後唔錫你０架啦！！！」

一晚，入左房玩，準備玩完就訓覺．．． 

小笨：「媽媽，公公電視精黎０架，成日睇電視，睇到眼睛壞曬！」
笨媽：「WAKAKAKAKKAKA！！！」 

小笨真係名符其實：一時唔偷雞做保長！！

放學，去買蛋撻。笨媽諗住帶小笨去買新鮮熱辣「蘇」皮蛋撻。

小笨：「媽媽，唔係響呢間買呀，響果邊果間呀，我帶你去丫。」
笨媽：「咦，唔係買開呢間０架咩？」
（心諗，莫非小笨鐘意食曲奇皮蛋撻？莫非笨婆婆同小笨買開另一間？）
小笨：「媽媽，係呢間啦！」
笨媽：「啊啊，原來係呢間，好味０的咩？」
小笨：「係呀，呢間唔熱０架！」
笨媽：「．．．．」

竟然．．．專登去唔熱果間買．．．．！！
汗曬．．．．

16號同小慈、灰太郎一齊去完觀塘 playtown 玩,
估唔到17號響海洋公園又會撞見埋樂樂哥哥喎,
真係開心, 咁多人陪小笨玩~~

最開心, 係小笨響學校識到 K1 的同名同姓小朋友,
同埋小朋友的同學仔,
最近三個小朋友玩得好埋,
小笨不知幾咁開心~~

9月26日跟教會去樹屋玩,
馬騮仔小笨終於有得真係爬樹樹啦!

間樹屋其實都有少少高,
我估起碼有兩三層樓高掛?
大人細路都得爬得幾開心咁:

本來以為小笨太細無得爬,
點知工作人員話佢地的紀錄最細參加者係兩歲,
咁, 小笨就有得玩啦!

全程小笨要自己上去, 無得爸爸陪,
但就有工作人員姐姐(橙色衫姐姐)沿路「護送」,
教佢點爬:

上到去樹屋, 教會的 vivian 姐姐已經響上面等住佢啦~

而, 最精彩的部份, 係落黎的方法: 「沿 pole 滑落黎」!

開心死小笨呀, 佢由細到大都成日幻想自己係 fire fighter、沿住條 pole 滑落黎0架!
今次終於俾佢狠到啦!!

今日送左小笨返學後, 唔駛煮飯,
快快手補返 upload 上次「登台」的照片同video俾大家睇下先~

由於呢次表演, 距離暑期班已經兩個星期, 加上表演前又無得練一次先
(個老師無黎到...)
所以呢三個細路純粹係靠自己「殘存」的記憶黎跳,
都...有六成...似啦,
哈哈, 得三四歲, 算係好叻0架啦我覺得~~~

之前等出場時小笨好驚好想喊,
因為人生路不熟, 又唔知咩叫表演,
但係踩完台之後, 就好開心啦,
表演果陣仲好風騷添, 紥紥跳, 懶醒咁~

完曬個 function, 大家可以隨便上台拍照留念,
小笨就更加係得戚到不得了啦,
大家睇佢幾開心!

中秋果排, 小笨收到一份由小飯寄黎的禮物,
內容係咩, 連飯母都唔知喎,
於是, 笨媽決定影低俾飯母睇:

內容好豐富, 包括小笨上次去韓國扭蛋得到的手錶 (唔記得帶返香港)、珍寶珠、
三個 finger puppet (鰐魚、rat、bird)、手帶、暴龍卡 (小飯同小笨響韓國時當寶0架)、
仲有三張卡仔。

多謝曬多多姐姐~~

今日返學, 明明小笨好風騷0架喎,
點知去到課室門口,
有個同學仔喊、唔捨得媽咪,
小笨拿拿聲又喊埋一份!!!

開左學成三個星期啦喎, 仲喊??
唔係呀化???!??!?!?!?

諗返轉頭, 明明小笨 K1 時無喊0架喎!!!
(全日班果一兩日就有喊, 之後轉左去下午班一次都無喊0架....)
死囉, 個女越湊越細個囉......

後尾問小笨, 同學仔喊左幾耐至肯入課室,
小笨淡然咁話:「好快之嘛~」
笨媽0岩0岩想話:「啊, 係咩」
點知小笨跟手加一句:「之後輪到聰聰喊~」
講完仲有少少陰陰咀笑添!!

呀.....  莫非升左上 K2, 小朋友係會變得「長情」0的0既...?????

尋日係小笨人生中第一次登台，
仲要係有「粉墨」（化粧）0架添，
開心到小笨死死下呀！
（正一貪靚精！）

不過初初集隊時，
笨小孩又維持一貫作風－－想喊，
而笨媽當然亦都有曬心理準備佢會專登搭車去紅磡「表演喊」，
所以笨媽都無話好誠意咁邀請一眾親友黎捧場，
結果，當小笨順利「踩台」同「演出」時，
笨媽都真係幾喜出望外呀～

咁，其實大小姐係登台表演咩呢？
查實係暑期班「畢業」，
各位望子成龍0既父母貼埋車錢同時間，
去幫舞蹈學校做「生招牌」。
期間的安排，恕笨媽覺得「油麻地」，
不過，當係玩下都無妨0既～

成個表演有幾長？
我估，都跳左成．．．一分鐘左右0既，哇哈哈！

真係估唔到, 升K2的小笨, 開學都喊!

都係笨媽衰, 走左又返轉頭, 因為遇到熟人丫嘛,
咪返轉頭嗲兩句囉, 典知小笨一見到笨媽,
眼淚突然決堤喎, 真係, 嚇一跳呀!
好彩另外都有一個男仔喊, 而且據小笨講, 喊得仲耐仲大聲,
咁, 都好0的...

之後去跳舞, 個傻豬出黎時,
話俾笨媽知, 佢又喊左呀!
因為雖然同暑期班係同一個老師,
但一來0的朋友仔唔同曬,
二來個老師無厘啦間講曬全英文 (後尾至知逢星期三呢班係英文班...),
小笨話「我都聽唔明英文」、「我都唔識英文」...
加上個傻小笨喊開就係少少 moody 啦,
唉... 好彩無喊到嘔0者...
我估個老師都滴曬汗...

睇黎星期六去文化協會上英文, 一定又喊啦...

星期一去Meadow上英文, 又係喊啦....

全靠大姨媽同大表哥，
小笨今年終於有得玩泡泡池啦，
「狠」左足足一年啊！！
今年亦都終於無辜負大表哥啦，
仲記得上年去左兩次，
第一次去到小笨好驚、唔肯玩，
攪到表哥都無玩，激死姨媽，
第二次同埋小飯去，
點知制水、泡泡池無開，
個噴水區小飯又臨場縮沙，激死人，
結果上年淨係響場外隻蛋蛋度玩水槍。

今年，終於有得玩啦～～～

多謝姨媽和哥哥出錢出力陪我地玩玩啊～～～

（我地姨媽唔係立亂出鏡0架～）

小笨終於「狠」到有得著靚靚芭蕾舞衫啦~~~
（笨婆婆超勁，估到小笨一試著左就唔肯除！）
聽日會係第一堂啊，希望佢會玩得開心啦~~~