笨小孩之輕鬆記事

全靠行行哥哥，笨母女先至見識到咩叫「成灘海星」！

今次仲係笨次妹的第一次「勾亭」添！
佢好乖，人家玩三個鐘，　佢訓足三個鐘，
真係好湊～～～

超可愛人氣笨次妹０既靚靚胎毛，
終於俾笨媽剪曬，變左個skin head，
笨爸為此十分咁肉痛，
不過笨媽咁做，都係為左希望笨次妹大個之後０的頭髮會更靚靚０者。

五個月大的笨次妹，
好鐘意舉腳，仲識得翻身添。
第一晚識得翻身時，
連續三次訓著覺後唔小心翻轉左，
嚇到大喊，好攪笑！

今日笨家姐同笨爸仲分別話見到笨次妹翻身後「前進」左一步添，
唔知真定假，照計八個月至會識得爬，
我估佢地睇錯０乍掛．．． 

不過笨次妹埋身食奶好水皮啊，
攪到笨媽右邊就快回奶啦，左邊都產量大跌，
要笨媽用奶泵催谷至keep到奶，
真係唔掂，次次都要趁條友訓著覺至可以埋身食奶，
但明明０岩０岩由麻麻處接返黎時，
一個星期後就已經可以埋身食０架啦，
都諗唔明點解攪攪下反而又變左唔肯埋身食，
到底問題出響邊呢？？？

這是才四天大的笨次妹, 看起來不像那麼小吧?

兩個笨小孩, 呵呵呵~~

響產房飽受煎熬同責罵的笨媽，
本來去到產後的大房，都覺得幾OK，
有少少費事「搬屋」去私家房，
點知笨爸一見到個我個「角落床位」，
竟然話太窄喎，
（查實我幾鐘意自成一角，而且個大房得四張床，唔會太嘈）
於是搬左去私家房，
嘩，嚇一跳呀，勁豪華啊！！

間病房真係成個酒店房咁，
一間房兩張床，每人自己一個plasma電視吊響天花任睇，
最好係升降床用電子按鈕，
一日起碼按十幾廿次，唔駛「攪攪下」，正！
更正0既係個廁所竟然有暖水洗pat pat，
個「觀音淨瓶」即刻可以收起啦！
洗手都有暖水0既，不過要開好耐至出到暖水，
太徙水太徙時間，後尾笨媽都放棄左，算係少少美中不足。
不過私家房最最最大的好處，
係可以「彈性」處理訪客人數同時間！
連小笨都可以「半明半暗」咁黎探笨媽同妹妹！
仲上埋笨媽張床度、食埋笨媽0的野添！
開心到小笨死死下呀，
初時響大房無得入黎探笨媽同妹妹，
笨媽都覺得幾可惜0架，
估唔到後尾咁好，可以同小笨一齊！

所以話呢，真係，一分錢一分貨～
最「盞鬼」係呢樹0的姑娘會問病人「點稱呼」，
然後貼響房門口，
所有入黎的工作人員就會極之親暱咁稱呼你，
笨媽簡直有突然從地獄彈上天堂感覺！

謹此多謝各位納稅人的間接資助，
「襟山哈咪打」！

自從響笨婆婆屋企住落左，
唔駛煮唔駛洗，
日日歎世界，
笨次妹都越住越安落，
再無話成日「蠢蠢欲動」啦。
早兩星期去例行產檢，
醫生都話笨次妹「落左一半都無」，
似乎住得甚是舒服，
於是笨婆婆同笨媽都估計，
笨次妹會好似家姐小笨咁，
住到預產期果日至蒲頭０架啦。

世估唔到22號呢晚，
由九點幾十點開始，
又好似多左宮縮喎，
由於之前有「報假案」的前科，
笨媽加倍咁審慎，
照樣同左小笨訓覺先，
咁，十一點幾小笨訓左（無錯，小笨係一隻「夜鬼」），
笨媽就打電話俾姨媽，
叫佢放定個電話響床頭，
隨時stand by。

訓到一點鬆０的，
笨媽已經有相當把握「應該真係黎料」，
點知呢個時候，小笨竟然「醒醒地」喎！
笨媽於是照樣同小笨去夜尿，
然後氹返小笨訓覺，
結果兩點先至打俾姨媽。
姨媽九秒九聽電話，
十秒十已經上左黎敲門啦，
而且上黎之前仲已經叫左屋苑的「食蕉」叔叔幫我截定的士，
真係，快到呢！

兩點幾，好順利入左院，
打埋俾笨爸，
姨媽任務就完成啦，
可憐笨媽仲躊躇滿志，
以為第二胎有經驗，
會處理得好好，
完全唔知惡夢尚未開始！

一初響待產病房，
笨媽真係幾醒０架，
成間房雖然得笨媽一個響樹呻吟
（其他人都唔似待產０既，好似淨係入黎訓覺咁。。。）
但係笨媽都「吟」得好克制，
一直到陣痛每兩三分鐘一次，
笨次妹都仲未「落黎」喎，
姑娘都話「有０的怪」。
BB未落黎，即係未生得，
笨媽唯有繼續「吟」啦，
一直吟到開到四度，
終於有「想去大便」的感覺啦，
其實都係少少０乍，
但有理無理，快０的話俾姑娘知。
姑娘就有理無理，安排我去產房啦。
當時笨媽都仲好忍到痛，
無吟到鬼殺咁嘈，
淨係自己響度「唔唔」聲，
姑娘都話叻，話做得好好，
殊不知。。。

入到產房，
換好曬衫，
就開始痛到ＰＫ啦！
開初兩下痛，都仲聽姑娘話「唔痛唔好聞笑氣」，
但兩下之後，就實在太痛啦，
決定「啋佢都傻」，聞左先算，
後尾開始生得啦，
又唔知點，
痛到癩曬Ｃ，
姑娘叫我「吉」起換床墊，
但我又痛到「吉」唔起喎，
總之笨媽就超痛超痛，
痛過生小笨果陣好多添，
生小笨果陣都仲可以跟到姑娘話幾時用力、幾時忍住，
縫針時亦都可以忍受，
但今胎連姑娘按下我個下腹我都好痛好辛苦，
於是姑娘由頭閙到尾，
最後仲閙：
「都第二胎０架啦仲咁亂！你都係唔好再生啦，害左人又害左自己！」
當時笨媽心諗：
「頂你個肺，早知第二胎仲難生過第一胎，我就唔生啦，
如果咁痛我仲生第三胎，我跟你改姓笨！」

就係咁，笨次妹就響笨爸的見証下，
響姑娘的謾罵中，
響笨媽極無台型的呻吟、掙扎同臭屎下，
出左世啦～

笨次妹出世的時間，同家姐小笨一樣，
都係上午八點幾，
體重又同家姐一樣，都係六磅半，
哈哈，又會咁橋０既！
（原來笨次妹費事重過小笨咁多，
所以早少少出世，
三十八週幾，亦可以算係三十九週，
已經重過家姐少少啦，
小笨3.045kg，笨次妹就3.100kg，哈！）

千呼萬喚，笨次妹終於出左世啦！
笨媽亦都終於甩身啦，
今次有覺好訓啦！

可能係獨力湊小笨同做家務太勞累啦，
感覺笨次妹成日蠢蠢欲動咁。 

為免突然作動入院時嚇親小笨，
同時等小笨可以有時間適應新的環境和照顧者，
呢個月開始我地搬左去柴灣公公婆婆屋企，
並且開始加入姨媽同婆婆一齊湊返學放學。

呢一晚，半夜，笨次妹照例攪到笨媽訓唔到覺，
而且半夜胎動同宮縮都突別落力，
咦，死火啦，縮多兩縮，好似「黎料」喎！
唔通笨次妹咁快就想搶閘出世？？

由於入院生仔的「走佬袋」乜鬼都未執，
笨媽唯有漏夜拿拿聲執走佬袋，
半夜兩點一直觀察到四點幾，
再執埋走佬袋，
卒之五點叫醒笨婆婆，
話佢之笨次妹「好似想出世」。

笨婆婆話多數都係０架啦，觀察多一陣啦，
等六點零鐘先至叫醒姨媽啦，
於是我地各自返上床訓下先，
睇下宮縮係咪會越黎越勁，
結果。。。。。。

無料到！

唉唉，原來係「報假案」。。。！
笨媽想早日甩身的願望，
又幻滅左啦，嗚。。。。

一直至為自己有左六個月0既笨媽,
上星期去產前檢查, 先至「發現」原來眨下眼已經七個月啦!!

無法啦, 早排小笨又放暑假又開學,
忙到笨媽一頭煙,
差乎連自己有左都唔記得,
以為自己「生股脹」添,
仲記得去產前檢查都算係咁0架啦!

醫生話笨次妹骨骼生得好好,
仲比較大左一至兩週,
但肚仔就細少少, 細左一兩日咁,
所以唔會係肥妹 (目前為止)。

笨媽返屋企諗諗下,
咦, 咁, 笨次妹咪同小寶表哥的「多啦A夢」身型0岩0岩好相反囉?
哇哈哈哈!!!

希望笨次妹唔好太「修長」啦,
BB仔太「修長」, 好似好怪咁~~~~

不過, 都係果句, 最緊要係健康正常啦!

小笨十分期待笨次郎的出生，
即使尚未成形，小笨姐姐已經對笨次郎有十分深厚的感情，
若干事例相當攪笑，聊記如下：

事例一

笨媽：如果你專登曳，我就打你pat！
小笨：如果笨次郎專登曳，我都唔會打佢pat，我會教返佢乖～

事例二

笨媽與小笨追巴士，小笨突然回頭對笨媽的肚皮講：
笨次郎，堅持住呀！
語氣相當慷慨激昂．．．

事例三

笨媽答應會帶小笨去一次產檢，等佢可以睇下笨次郎個樣樣，
小笨十分雀躍：好呀！我幫笨次郎影相丫，我揭起媽媽個肚肚，咁樣咁樣，幫笨次郎影好多好多相０既！

事例四

笨媽朝早又賴床唔肯起身，小笨要拉笨媽起身，咁，就要騎響笨媽個肚上面，
估唔到小笨騎之前，向笨媽個肚皮話：笨次郎，你忍住先呀０下！

事例五

平日成日扭抱的小笨，有一次竟然響笨媽抱佢痾尿尿時扮曬野，
死都唔肯被笨媽抱，仲話：我驚壓扁笨次郎呀！
（之後當然係會繼續扭抱啦．．．）

此外，小笨仲成日玩玩下會同笨次郎講野，
比如：
笨次郎，你睇下我～
笨次郎，你估邊個響出面？

最攪笑係，小笨知道有BB個肚會變大，
於是成日形住笨媽個肚變大，
無端端訓醒都會問：媽媽，點解你個肚肚咁大０既？
笨媽當然誠實咁回答：媽媽肥肥丫嘛～
估唔到小笨十分緊張，即刻話：唔係呀，因為你有左BB呀！
笑死人！

希望小笨同笨次郎的感情，
將來都真係可以咁好啦～～
最好就好似飯母同笨媽咁～～～
呵呵呵～～～