笨小孩之輕鬆記事

由出世開始已經係「更年期」的笨公公，
呢排又皮質醇持續高企，
早排開完笨媽後，呢排竟然開小笨。

果日食晚飯，小笨又囉囉唆唆，食得慢吞吞，
笨公公食完飯，離開飯桌時，向仍在龜速進食的小笨講：
「你好嘈呀！」
蜀不知小笨唔知死，不假思索就回覆一句：
「你好嘈呀！」
笨媽同笨婆婆嚇左一跳，對於小笨的自殺式攻擊感到十分震驚。

笨公公又話：「我怕左你呀，我走啦！」（邊講邊回睡房）
點知小笨不甘示弱，仲大聲過笨公公：
「我怕左你呀，我走啦！」但由於佢自己仲食緊飯，
於是佢又毫不遲疑加多句：「我食埋呢啖就走啦！」
笨媽同笨婆婆一邊好驚公公「著火」，一邊又覺得好好笑，
大家都唔敢出聲，一味拿住個飯碗扮食飯，一邊偷偷「震震震」咁笑。

好彩小笨仲細，笨公公可能亦都覺得佢好攪笑掛，
竟然無再丙小笨，就入左房啦！
呼，嚇死人咩！
之後笨媽都有細細聲教小笨唔可以駁咀，
不過每次笨媽自己諗返起件事，
尤其諗起小笨果句「我食埋呢啖就走啦！」，
就覺得好攪笑！

不過，小笨再大多幾歲，仲係咁駁咀，大家就應該笑唔出啦～